माणुसकीचा प्रत्यय! आठ तास शस्त्रक्रिया करुन मजुराचा तुटलेला हात पुन्हा जोडला, पण डॉक्टरांनी एक पैसाही घेतला नाही..
नांदेडमध्ये मनगटापासून वेगळा झालेला हाताला पुन्हा जोडण्यात डॉक्टरांना यश आले आहे. हातावर शस्त्रक्रिया करून मजुराला जीवनदान दिले आहे. यामुळे डॉक्टरांचे कौतुक होत आहे.
नांदेड: समाजात पोलीस आणि डॉक्टर हा महत्वाचा दुवा असतो. केवळ समाजभान डोळ्यासमोर ठेवून न्याय आणि जीवनदान देण्याचं कार्य ते करत असतात. अशाच एका घटनेत डॉक्टरांनी एका मजुराचा मनगटापासून वेगळा झालेला हाताचा पंजा शस्त्रक्रियेने जोडून जीवनदान दिले आहे. या प्रकरणात पोलिसांची भूमिका देखील महत्वाची ठरली असून खाकी वर्दीतही माणुसकी असते, हे पोलिसांनी दाखवून दिले आहे.
त्रिशरण कैलास थोरात (३७) असं जीवदान मिळालेल्या तरुणाचं नाव आहे. भाग्यनगरच्या पोलीस ठाणे हद्दीत २० जुलै रोजी रात्री ८.३० वाजता मारहाणीची घटना घडली होती. त्रिशरण कैलास थोरातवर सुरज संजय बसवंते, आकाश भागोराव रणमले आणि विनय राम जाधव या तीन युवकांनी तलवारीने वाक केले होते. या हल्ल्यात त्रिशरण थोरातचा डाव्या हाताचा मनगटापासूनचा भाग वेगळा झाला होता. घटनेनंतर त्रिशरण कैलास थोरात हा तीन तास जखमी अवस्थेत पडून होता. भाग्यनगर पोलीस स्थानकाचे पोलीस निरीक्षक बोलावा यांनी घटनास्थळी धाव घेतली.
कर्तव्यापेक्षा माणुसकी मोठी असते, हे दाखवत रक्ताच्या थारोळ्यात पडलेल्या मजूर त्रिशरण यास स्वत:च्या गाडीत उपचारासाठी पाठवले होते. पंचनामा करुन आरोपी विरोधात गुन्हा दाखल केला. दरम्यान जखमी हा घरातील कर्ताधर्ता व्यक्ती असून मोलमजूरी करुन तो उदरनिर्वाह करायचा. ही बाब पोलीस अधीक्षक श्रीकृष्ण कोकटे, अतिरिक्त पोलिस अधिक्षक अभिनाश कुमार यांना समजली. त्यानंतर त्यांनी जखमीचा हात जोडण्यासाठी त्याला विष्णुपुरी शासकीय रुग्णालयात नेण्याचे आदेश पोलीस कर्मचाऱ्यांना दिले. पोलीस जखमीला घेऊन रुग्णालयात पोहचले. त्याच्या हाताचा पंजा कॅरीबॅगमध्ये घालून नेण्यात आला होता. परंतू तेथील डॉक्टरांनी ऑपरेशन होणार नसल्याचं सांगितलं.
त्यानंतर पोलीस अधीक्षक श्रीकृष्ण कोकाटे यांनी सुरूवातीला छत्रपती संभाजी नगर आणि मुंबई येथील डॉक्टरांशी संवाद साधला. मात्र त्यांना प्रतिसाद मिळाला नाही. त्यानंतर नांदेडचे अस्थिरोग तज्ञ डॉ. देवेंद्रसिंह पालीवाल यांच्यासोबत संवाद साधला. त्याच रात्री डॉ. पालीवाल यांनी ८ तास शस्त्रक्रिया करून जखमी त्रिशरणचा हात जोडला आहे. आज त्याच्या डाव्या हाताच्या बोटांची हालचाल होत आहे. विशेष म्हणजे या शस्त्रक्रियेसाठी तीन ते चार लाख रुपये खर्च येणार होता. मात्र जखमी युवक गरीब आणि मोलमजुरी करणारा असल्याने डॉ. देवेंद्रसिंह पालीवाल यांनी माणुसकी दाखवत पैसे घेतले नाहीत. पोलिसांनी केलेली मदत आणि डॉक्टरांनी जीवनदान दिल्याने तरुणाने आभार मानले आहे.
