तिकिटाचे पैसे परत द्या, राज्य सरकारला रोहित पवारांचा घरचा आहेर…

आरोग्य विभागाच्या परीक्षा अचानक पुढे ढकलण्यात आल्यामुळे काल रात्रीपासून हजारो विद्यार्थ्यांना समस्यांना सामोरे जावे लागले आहे. अचानक परीक्षा पुढे ढकलल्या गेल्याचा मेसेज मिळाल्यामुळे विद्यार्थ्यांमध्ये गोंधळ निर्माण झाला असल्याने राज्यभरातून महाविकास आघाडी सरकारच्या विरोधात रोष व्यक्त केला जात आहे. भाजपने राज्यात अनेक ठिकाणी या विरोधात आंदोलने केल्यानंतर आता राष्ट्रवादी काँग्रेसचे आमदार रोहित पवार यांनीही महाविकास आघाडी सरकारला घरचा आहेर दिला आहे.

मागील सरकारने आरोग्य भरती रखडवल्याने आरोग्य व्यवस्था खिळखिळी झाली. आपल्या सरकारने आरोग्य भरती सुरू केली पण गोंधळाचं वातावरण दिसतंय. असंच चालू राहिलं तर आधीच्या आणि आपल्या सरकारमध्ये काय फरक राहील? याचा राज्य सरकारने गांभीर्याने विचार करायला हवा.

— Rohit Pawar (@RRPSpeaks) September 25, 2021

‘लवकरात लवकर म्हणजेच काही दिवसांत परीक्षा पुन्हा घेण्यात यावी. ज्या काही त्रुटी आहेत त्या सोडवाव्यात. त्यासाठी एखादा वरीष्ठ अधिकारी नेमावा. आणि ज्यावेळी परीक्षा घेतली जाईल तेव्हा सर्वसामान्य मुलं एसटीचा प्रवास करतील तो तिकिटाचा खर्चही सरकारच्या माध्यमातून कसा देता येईल याबाबत विचार करावा. काहीही झालं तरी युवकांच्या भविष्याशी कुठल्याही सरकारनं खेळू नये’, अशा शब्दात आमदार रोहित पवार यांनी आघाडी सरकारला घरचा आहेर दिला. राजेश टोपे साहेब यात लक्ष घालत असल्याने लवकरात लवकर परीक्षा होतील, असेही रोहित पवार यांनी यावेळी सांगितले.