सातारा : साडेतीन शक्ती पिठाच्या दर्शन घेण्यासाठी निघालेल्या साताऱ्यातील शुभांगी पवार (वय ३२) यांचा नांदेड येथे अपघाती मृत्यू झाला. साताऱ्यातील हिरकणी ग्रुपच्या काही महिला बाईक राईड करत महाराष्ट्रातील साडेतीन शक्तीपीठांचे दर्शन घेण्यासाठी निघाल्या होत्या. मात्र या ग्रुपमधील शुभांगी संभाजी पवार यांचा नांदेड जिल्ह्याच्या अर्धापूर तालुक्यातील दाभड हद्दीत भोकर फाटा येथे टँकरच्या धडकेत दुर्दैवी मृत्यू झाला. आज सकाळी १० वाजेच्या दरम्यान ही दुर्घटना घडली.
सातारा येथील हिरकणी ग्रुपच्या नऊ महिला सदस्या 10 ऑक्टोबर रोजी 1 हजार 868 किमी प्रवासासाठी बाईकने निघाल्या होत्या. नवरात्रोत्सवात आदिशक्तीच्या साडेतीन शक्तीपिठांचे दर्शन घेण्याची ही मोहीम होती. त्यांनी कोल्हापुरातील महालक्ष्मी मंदिरात दर्शन घेतले. तिथून तुळजापूरला आई तुळजाभवानीचे दर्शन घेतले. त्यानंतर माहूर गडावर रेणुका मातेच्या दर्शनासाठी जात असताना भोकर फाटा, दाभड येथे एका टँकरने शुभांगी यांच्या बाईकला जोरदार धडक दिली. बाईकवरुन पडल्यानंतर टँकर डोक्यावरुन गेल्यामुळे शुभांगी जागीच ठार झाल्या. त्यांचे पार्थिव शवविच्छेदन करण्यासाठी अर्धापूर जि. नांदेड येथे प्राथमिक आरोग्य केंद्र दाखल केले आहे.
शुभांगी पवार सातारा शहरात याेगाचे प्रशिक्षण द्यायच्या. तसेच त्यांना अध्यात्माची आणि सामाजिक कार्याची सुद्धा खूप आवड हाेती. आपल्या जगण्याला एक वेगळेपण असावे असा त्यांचा कायम मानस असायचा. बाईकवर स्वार होऊन निसर्गात भटकंती करणे त्यांना खूप आवडायचे. शुभांगी यांच्या अपघाताची माहिती समजताच सातारा शहरातील अनेक सामाजिक संस्थांनी पवार कुटुंबियांची भेट घेऊन त्यांचे सांत्वन केले. शुभांगी यांच्या निधनाबद्दल खासदार उदयनराजे भाेसले यांनी देखील शाेक व्यक्त केला.
बातमी शेअर करण्यासाठी येथे क्लिक करा
