ताडदेव परिसरातील ‘कमला’ इमारत आग दुर्घटना ; मृतांच्या कुटुंबीयांना 5 लाखांची नुकसानभरपाईची आदित्य ठाकरेंची घोषणा

मुंबईतील ताडदेव परिसरातील कमला या 20 मजली इमारतीला आज सकाळी साडे सहा वाजण्याच्या सुमारास ही भीषण आग लागली होती. या आग दुर्घटनेत ६ जणांचा मृत्यू झाला आहे तर २३ जण जखमी झाले आहेत. त्यापैकी 3 जण गंभीररित्या जखमी झालेत. दरम्यान या घटनेनंतर आज पर्यावरण मंत्री आणि मुंबई उपनगराचे पालकमंत्री आदित्य ठाकरे यांनी घटनास्थळाची पाहणी केली आहे. यावेळी त्यांनी घटनेतील मृतांच्या कुटुंबियांना प्रत्येकी 5 लाखांची मदत केली जाणार असल्याची घोषणा केली.

• या दुर्दैवी घटनेत मृत्यूमुखी पडलेल्या नागरिकांच्या कुटुंबियांना सरकार ५ लाख रुपयांची भरपाई देईल.
• जखमींवर उपचार करण्यास २ रुग्णालयांनी नकार दिल्याच्या बातम्या आल्या होत्या, मात्र दोन्ही रुग्णालयांनी, जखमींना दाखल करून उपचार केल्याचे, मला कळवले आहे.

— Aaditya Thackeray (@AUThackeray) January 22, 2022

आदित्य ठाकरे यांनी ट्विट करत लिहिले की, ताडदेव इमारत आग दुर्घटनेत ज्या नागरिकांचा दुर्दैवी मृत्यू झाला. त्यांच्या कुटुंबियांना सरकारकडून 5 लाखांची नुकसान भरपाई दिली जाईल. यावेळी त्यांनी अग्निशमन दलाच्या अधिकाऱ्यांकडून संपूर्ण परिस्थितीची माहिती घेतली. याशिवाय आग दुर्घटनाग्रस्त इमारतीतील रहिवाशांशी बोलून या दुःखद प्रसंगी सर्वतोपरी मदत करण्याचे आश्वासन आदित्य ठाकरे यांनी दिले आहेत. आग दुर्घटनेत 23 जण जखमी झाले आहेत. या जखमींना भाटिया रुग्णलयात उपचारासाठी दाखल करण्यात आलंय. मात्र इतर जखमींना वाचवल्यानंतर त्यांना वोक्हार्ट आणि रिलायन्स रुग्णालयात घेऊन गेले असता. या दोन्ही रुग्णालयांनी जखमींवर उपचार करण्यास नकार दिला. यामुळे नकार देणाऱ्या या दोन्ही रुग्णालयावर कारवाई करण्यात येणार असल्याचे महापौर किशोरी पेडणेकर यांनी सांगितले.