विरोधी पक्षनेता म्हणून भ्रष्टाचाराचे प्रकरण बाहेर काढण्याचा माझा अधिकार; फडणवीसांची प्रतिक्रिया

झूम मराठी वृत्तसेवा

मुंबई : आयपीएस अधिकारी रश्मी शुक्ला यांचा समावेश असलेल्या राज्य गुप्तचर विभागातील (SID) कागदपत्रे गायब झाल्याप्रकरणी विरोधी पक्षनेते देवेंद्र फडणवीस यांना सायबर सेलने समन्स बजावले आहे. सायबर सेलने शुक्रवारी मॅजिस्ट्रेट कोर्टाला सांगितले की साक्षीदार म्हणून त्याचे म्हणणे नोंदवण्यासाठी समन्स बजावले आहे. फडणवीस यांनी मार्चमध्ये दिलेल्या मुलाखतीचा हवाला देत पोलिसांनी केंद्रीय गृहमंत्रालयाकडून कागदपत्रे मागवण्यासाठी कोर्टात धाव घेतली आहे. पोलिसांच्या दाखल केलेल्या याचिकेवर न्यायालय मंगळवारी निर्णय देणार आहे. दरम्यान, यावर विरोधी पक्षनेते देवेंद्र फडणवीस यांनी प्रतिक्रिया दिली आहे.

सायबर सेलने मला चौकशीसाठी बोलावले नाही तर एक प्रश्नावली पाठवली. मला सायबर सेलकडून पत्र आले आणि त्यावर मी योग्यवेळी बोलणार. विरोधी पक्षनेता या नात्याने मला भ्रष्टाचाराची प्रकरणे निकाली काढण्याचा अधिकार आहे. त्यामुळे माहिती कुठून मिळाली हे विचारण्याचा सरकारला अधिकार नाही, अशी स्पष्टोक्ती फडणवीसांनी दिली आहे.