रहस्यमयरीत्या बेपत्ता झालेल्या धनश्रीचा मृतदेह अखेर सापडला; चार दिवसांच्या शोधमोहीमेचा दुर्दैवी शेवट..!

,

चाळीसगाव (Chalisgaon) तालुक्यातील तरवाडे बुद्रुक येथे शुक्रवारी शाळेतून घरी येताना रहस्यमयरीत्या बेपत्ता झालेल्या 9 वर्षीय धनश्री उमेश शिंदे हिचा मृतदेह अखेर सापडलाय. तब्बल चार दिवसांनी गावाशेजारील एका विहिरीत हा मृतदेह आढळून आला आहे. या घटनेमुळे परिसरात मोठी खळबळ उडालीय. धनश्री ही जिल्हा परिषद शाळेत चौथीच्या वर्गात शिकत होती. शुक्रवारी (12 डिसेंबररोजी) सकाळी 10 वाजता शाळेत गेलेली धनश्री सायंकाळी घरी न परतल्याने शोधमोहीम सुरू करण्यात आली होती. ग्रामपंचायतीच्या सीसीटीव्ही फुटेजमध्ये सायंकाळी सुमारे 4.55 वाजता ती ग्रामपंचायत कार्यालयाजवळून जाताना दिसून आली होती. त्यानंतर गावाबाहेरील शेत रस्त्यावर तिचे दप्तर आढळून आल्याने अपहरणाचा संशय बळावला होता. दरम्यान, आज गावालगतच्या शिवारातील एका विहिरीत धनश्रीचा मृतदेह आढळून आलाय. घटनेची माहिती मिळताच जळगाव एलसीबीचे पथक व वरिष्ठ पोलीस अधिकारी घटनास्थळी दाखल झाले आहेत. विहिरीतून मृतदेह बाहेर काढण्यात आले असून या प्रकरणी चाळीसगाव तालुका पोलीस ठाण्यात आधीच गुन्हा दाखल असून, मृत्यूचे नेमके कारण आणि घटनेमागील परिस्थितीचा सखोल तपास एलसीबी व पोलीस प्रशासनाकडून करण्यात येत आहे. 60 ते 70 तासांहून अधिक काळ चाललेल्या शोधमोहीमेचा दुर्दैवी शेवट झाल्याने कुटुंबीयांचा आक्रोश अनावर झाला असून संपूर्ण गाव शोकसागरात बुडाले आहे.