Jalgaon | जळगावचा अभिमान सुजाता बागूल यांचा राष्ट्रपतीच्या हस्ते सन्मान, देशभरातील १५ परिचारकांचा गौरव..
सुजाता बागूल यांचे कार्य म्हणजे सेवा, समर्पण आणि स्त्रीशक्तीचा सन्मान आहे. त्या संपूर्ण जळगाव जिल्ह्याचा अभिमान आहेत.
जळगाव जिल्ह्यातील कठोरा येथील प्राथमिक आरोग्य केंद्रात कार्यरत असलेल्या सहायक परिचारिका सुजाता अशोक बागुल यांना राष्ट्रपती श्रीमती द्रौपदी मुर्मू जी यांच्या हस्ते राष्ट्रीय फ्लोरेन्स नाइटिंगेल पुरस्काराने सन्मानित करण्यात आले.
आरोग्य क्षेत्रात गेली 18 वर्षे अत्यंत निष्ठा, कष्ट व समर्पित भावनेने सेवा बजावणाऱ्या सुजाता बागुल यांनी राष्ट्रीय आरोग्य कार्यक्रमांची प्रभावी अंमलबजावणी करत उल्लेखनीय कामगिरी केली आहे. संस्थात्मक प्रसवासाठी गरोदर महिलांना प्रोत्साहन देणे, लसीकरणाचे शंभर टक्के उद्दिष्ट साध्य करणे, आरोग्य शिबिरे, जनजागृती रॅली आणि स्वच्छता मोहिमांमध्ये प्रभावी सहभाग यांसारखे उपक्रम त्यांच्या नेतृत्वाखाली राबविण्यात आले आहे.
कोविड 20 कोरोना काळातील त्यांच्या उत्कृष्ट सेवेसाठी त्यांना जिल्हास्तरीय ‘फ्लोरेन्स नाइटिंगेल’सह विविध पुरस्कारांनी ही सन्मानित करण्यात आले आहे. या पुरस्काराचे स्वरुप एक लाख रुपये रोख आणि प्रशस्तीपत्र आहे.
नवी दिल्लीत झालेल्या भव्य समारंभात देशभरातील १५ परिचारकांचा गौरव करण्यात आला. केंद्रीय आरोग्यमंत्री जे. पी. नड्डा, प्रतापराव जाधव, अनुप्रिया पटेल यांची उपस्थिती लाभली.
