धक्कादायक! दिल्लीत ९ वर्षांच्या मुलीवर बलात्कार करून हत्या, मृतदेह जाळण्याचाही प्रयत्न

नवी दिल्लीः राजधानी दिल्लीत अतिशय धक्कादायक घटना घडली आहे. दिल्लीत एका ९ वर्षांच्या अनुसूचित जातीतील मुलीवर बलात्कार करून तिची हत्या  करण्यात आली. एवढचं नव्हे तर नराधमांनी तिचा मृतदेह जाळण्याचाही प्रयत्न केला. पोलिसांनी या प्रकरणी एका पुजाऱ्यासह तिघांना ताब्यात घेतलं आहे. याप्रकरणी चौकशी करण्यात येत आहे. तर स्थानिकांनी न्याय आंदोलन करत न्याय देण्याची मागणी केली आहे 

धक्कादायक! दिल्लीत ९ वर्षांच्या मुलीवर बलात्कार, हत्या करून मृतदेह जाळण्याचा प्रयत्न

दिल्लीत कँन्टोन्मेंट भागातील पुराना नांगल भागात एका मागास कुटुंबातील ही पीडित मुलगी होती. तिचं कुटुंब एका स्मशानाजवळ रहातं. ती सोमवारी संध्याकाळी स्मशानात पाणी आणण्यासाठी गेली होती. पण परतलीच नाही. स्मशानात तिचा मृतदेह असल्याची माहिती काही स्थानिकांना मिळाली. ते लगेचच मुलीच्या आईला घेऊन स्मशानात गेले आणि अंत्यसंस्काराच्या ठिकाणी असलेला तिचा मृतदेह दाखवला.

स्मशानातील कुलरमधून पाणी भरत असताना विजेचा धक्का बसल्यामुळे तिचा मृत्यू झाल्याचं आधी सांगण्यात आलं. मुलीच्या हातावर चटके दिल्याची निशाणं दिसत होती. तिचे ओठही निळे पडले होते, असं तिच्या आईने सांगितलं. पुजारीने आमच्या म्हणण्याविरोधात मुलीवर अंत्यसंस्कार केले. मुलीचा मृत्यू विजेचा धक्का बसून झालेला नाही. तर पुजारीने तिच्यावर बलात्कार केला आहे, असा आरोप मुलीच्या आईने केला.

 घटने प्रकरणी पोलिसात तक्रार करू नका. पोलिस तक्रार केली तर मृतदेहाचं पोस्टमार्टम होईल. तिचे अवयव चोरूले जातील. यापेक्षा वेळ न घालवता लवकरात लवकर अंत्यसंस्कार केले पाहिजे, असं पुजारी राधेश्याम आणि त्याच्या साथीदारांनी मुलीच्या आईला सांगितलं. मुलीच्या पालकांना पैसे दिल्याची शंका स्थानिकांना आली.

आमच्या समाजाच्या काही जणांनी जळत असलेली चिता विझवली. मुले पाय धरून मृतदेह बाहेर काढला. तिला न्याय मिळायला हवा. आरोपीला कडक शिक्षा झाली पाहिजे, असं मुलीच्या आईने सांगितलं. तर एका व्यक्तीने आपल्याला मारहाण केली आणि पोलिसात तक्रार न करण्यासाठी धमकी दिली, असं मुलीच्या वडिलांनी सांगितलं. घटनेवळी आपण बाजारात होतो. आपल्याला या घटनेबद्दल संध्याकाळी ७.३० वाजता कळलं. त्यावेळी तिच्या मृतदेहावर अंत्यसंस्कार सुरू होते. एका व्यक्ती आपल्याला मारहाण करत पोलिसात तक्रार न करण्यासाठी धमकावलं. तसंच २० हजार रुपये देऊ असंही ती व्यक्ती म्हणाल्याचं मुलीच्या वडिलांनी सांगितलं.

पण मुलीच्या आई-वडिलांनी हे प्रकरण पोलिसांत नेलं. जुन्या नांगल गावातील जवळपास २०० गावकरी स्मशानाजवळ एकत्र आले आणि त्यांनी या प्रकरणाची माहिती पोलिसांना दिली. रात्री १०.३० च्या सुमारास आम्हाला फोन आला. या प्रकरणी गुन्हा दाखल करण्यात आला आहे. बाल लैंगिक अत्याचार आणि मागासवर्गीय जाती-जमाती कायद्यांतर्गत गुन्हा दाखल केला गेला आहे, अशी माहिती साऊथ-वेस्ट जिल्हा पोलिसमधील वरिष्ठ अधिकारी प्रताप सिंह यांनी दिली