धुळ्यात उद्योग मंत्री उदय सामंत यांच्या विरोधात शिवसैनिकांची घोषणाबाजी

धुळे(झूम वृत्तसेवा) उद्योगमंत्री उदय सामंत हे आज धुळे जिल्ह्याच्या दौऱ्यावर आहेत. साक्री तालुक्यातील पिंपळनेर येथे नवनिर्वाचित सरपंच, ग्रामपंचायत सदस्य, पंचायत समिती सदस्य यांच्या सत्कार समारंभासाठी साक्रीच्या आमदार मंजुळा गावित यांनी सामंत यांना आमंत्रित केले होते. धुळे जिल्हाधिकारी कार्यालयात आढावा बैठकीसाठी मंत्री उदय सामंत येत असताना त्यांना धुळ्यातील शिवसैनिकांच्या रोषाला तोंड द्यावे लागले. उदय सामंत यांचा ताफा अडवण्याचा प्रयत्न करणाऱ्या शिवसैनिकांना पोलिसांनी वेळीच ताब्यात घेतले. शिवसेनेचे स्थानिक नेते शरद पाटील यांनी उदय सामंत यांच्यासह बंडखोरी करणाऱ्या आमदारांवर टीका केली आहे. गद्दार आमदारांविरोधात महाराष्ट्रात संतापाची लाट असल्याचं ते म्हणाले.

काही आठवड्यापूर्वीच उद्योगमंत्री उदय सामंत यांच्या गाडीवर पुण्यामध्ये कथित शिवसेना समर्थकांनी हल्ला केला होता. त्यानंतर आज पुन्हा धुळ्यामध्ये हा शिवसैनिकांनी सामंत यांचा ताफा अडवण्याचा प्रयत्न केल्यानं आश्चर्य व्यक्त केलं जात आहे. उदय सामंत यांच्या गाड्यांचा ताफा अडवण्याचा प्रयत्न केल्याप्रकरणी माजी आमदार शरद पाटील, शिवसेना जिल्हाप्रमुख अतुल सोनवणे, महानगर प्रमुख धीरज पाटील यांच्यासह शिवसेनेचे प्रमुख पदाधिकारी व कार्यकर्त्यांना धुळे शहर पोलिसांनी ताब्यात घेतलं आहे.

धुळे जिल्हा दौऱ्यावर आलेले उद्योगमंत्री उदय सामंत यांचा धुळे जिल्हा शिवसेनेकडून निषेध करण्यात आला आहे. शिवसेनेच्या जिल्हा मध्य मध्यवर्ती कार्यालयापासून शिवसेना पदाधिकारी कार्यकर्ते यांनी ५० खोके एकदम ओके, तसेच गद्दार आमदारांचा निषेध असो अशा घोषणा दिल्या. नेत्यांसह शिवसैनिक रस्त्यावर उतरले, ते जिल्हाधिकारी कार्यालयापर्यंत जाण्याआधीच पोलिसांनी सर्व शिवसैनिकांना ताब्यात घेतले आहे. शिवसेनेने घेतलेल्या या भूमिकेमुळे पोलिसांची काही काळ तारांबळ उडाली.

यावेळी माजी आमदार शरद पाटील यांनी आपली भूमिका मांडताना सांगितले की, ज्यावेळेस शिवसेना पक्षप्रमुख उद्धव ठाकरे हे आजारी पडले होते. त्यावेळेस या गद्दार आमदारांनी शिवसेनेशी व उद्धव ठाकरे यांच्याशी गद्दारी केली. त्यामुळे महाराष्ट्रात या गद्दार आमदारांविरोधात प्रचंड संतापाची लाट आहे. म्हणून या गद्दार आमदारांचा निषेध करण्यासाठी आम्ही रस्त्यावर उतरलो असल्याची संतप्त प्रतिक्रिया त्यांनी यावेळी दिली.