एकनाथ खडसें ऐवजी त्यांच्या, कन्या ॲड. रोहिणी खडसे-खेवलकर यांच्या नाव पुढे येण्याची शक्यता?

झूम मराठी जळगाव : राज्यपालांनी नामनिर्देशित करावयाच्या बारा आमदारांच्या यादीत राजू शेट्टींचे नाव बदलण्यात आले असून माजी मंत्री एकनाथ खडसेंच्या नावावरही आक्षेप घेतला जाण्याची शक्यता लक्षात घेता, खडसेंऐवजी त्यांच्या कन्या ॲड. रोहिणी खडसे-खेवलकर यांच्या नावावर सहमती होण्याची शक्यता आहे

विधान परिषदेवर राज्यपालांनी नामनिर्देशित करावयाच्या १२ जागा रिक्त असून राज्य मंत्रिमंडळाने गेल्या वर्षीच नोव्हेंबरमध्ये या १२ आमदारांच्या नावांची यादी शिफारसीसह राज्यपालांकडे पाठवली आहे. दहा महिन्यांनंतरही राज्यपालांनी या यादीबाबत कोणताही निर्णय घेतलेला नाही, अथवा ही यादी फेटाळलीही नाही.

सरकारचे प्रयत्न आमदारांच्या या रखडलेल्या नियुक्तीचा मुद्दा उच्च न्यायालयापर्यंत गेला. परंतु, न्यायालयालाही राज्यपालांच्या अधिकाराबाबत हस्तक्षेप करता येत नसल्याने यावरील सुनावणी पूर्ण होऊनही त्यातून निष्पन्न झाले नाही. अखेरीस सरकारकडून मुख्यमंत्री, उपमुख्यमंत्री राज्यपालांना नुकतेच जाऊन भेटले व या विषयाला चालना मिळाली.

राजू शेट्टींचे नाव वगळले या यादीतून राष्ट्रवादी काँग्रेसने राजू शेट्टींचे नाव वगळल्याचे सांगितले जाते. त्या बदल्यात दुसरे कोणते नाव दिले, याबाबत उत्सुकता आहे. तर एकनाथ खडसेंच्या नावाला भाजपचा तीव्र आक्षेप असल्याने त्या नावाबाबतही राष्ट्रवादी माघार घेण्याची शक्यता आहे. मात्र, खडसेंचे नाव अद्याप राष्ट्रवादीने वगळलेले नाही. त्यांच्या नावाला आक्षेप घेतला गेला तर त्यांच्या कन्या व जिल्हा बँकेच्या चेअरमन ॲड. रोहिणी खडसेंचे नाव पुढे येण्याची शक्यता व्यक्त होत आहे. खडसेंच्या नावावरील संभाव्य आक्षेपगुरुवारी खडसेंचा वाढदिवस साजरा झाला. त्यांच्या वाढदिवशीच राज्यपालांकडून या यादीवर शिक्कामोर्तब होण्याची शक्यता होती. मात्र, तसे होऊ शकले नाही. राजू शेट्टींचे नाव वगळल्याचे वृत्त याच दिवशी समोर आले. त्यामुळे खडसेंच्या नावावरील संभाव्य आक्षेप लक्षात घेता रोहिणी खडसेंचे नाव चर्चेत आले आहे.