एकनाथ शिंदेंसोबत जळगाव जिल्ह्यातील शिवसेना आमदार संपर्क क्षेत्राबाहेर…

झूम मराठी

विधान परिषदेच्या निकालात भाजपाने पुन्हा एकदा महाविकास आघाडीला धक्का दिला असताना शिवसेना नेते एकनाथ शिंदे बेपत्ता झाले असल्याने राजकीय भूकंप आला आहे. एकनाथ शिंदे संपर्काबाहेर असल्याने त्यांनी बंड पुकारल्याच्या चर्चांना उधाण आलं आहे. शिवसेनेकडून वारंवार एकनाथ शिंदेंसोबत संपर्क साधण्याचा प्रयत्न केला जात आहे. दरम्यान एकनाथ शिंदे सूरतमध्ये असून त्यांच्यासोबत १२ पेक्षा अधिक आमदार असल्याचं सांगितलं जात आहे. शिवसेनेचे जळगावमधील काही आमदारही संपर्क क्षेत्राबाहेर असून ते एकनाथ शिंदेंसोबत असण्याची शक्यता व्यक्त होत आहे. शिवसेनेकडून वारंवार त्यांच्याशी संपर्क साधण्याचा प्रयत्न केला जात असून त्यांचा फोन लागत नाही आहे.

शिवसेनेच्या मंत्रिपदांमध्ये दुसऱ्या क्रमांकाचे नेते म्हणून एकनाथ शिंदेंकडे पाहिलं जात असलं तरी त्यांना मिळालेल्या मंत्रिपदामध्ये इतर दोन मंत्री सातत्यानं हस्तक्षेप करत होते त्यामुळे एकनाथ शिंदे नाराज होते. नगरविकास मंत्रिपद असूनही मनमोकळेपणानं काम करता येत नसल्याची शिंदे यांची नाराजी होती असं सांगितलं जात आहे.

राज्याच्या विधान परिषदेच्या निवडणुकीची जबाबदारी देताना एकनाथ शिंदे यांना विश्वासात घेण्यात आलं नाही. पक्षानं या निवडणुकीसाठी एकनाथ शिंदे यांच्यावर विश्वास न दाखवता संपूर्ण जबाबदारी आदित्य ठाकरे आणि वरुण सरदेसाई यांच्यासह युवासेनेचे नेते सुरज चव्हाण यांच्याकडे दिली होती. याचीच खंत एकनाथ शिंदेंना होती.

शिवसेनेचे खासदार संजय राऊत यांच्या रोजच्या पत्रकार परिषदा आणि त्यांच्या वक्तव्यांवर एकनाथ शिंदे नाराज होते अशी माहिती समोर आली आहे. संजय राऊत प्रत्येकवेळी राष्ट्रवादीचे अध्यक्ष शरद पवार यांचीच बाजू मांडत असून शिवसेनेला याचा फटका बसत असल्याचं मत एकनाथ शिंदेंचं होतं.

याबाबतही एकनाथ शिंदे नाराज होते.एकनाथ शिंदे सूरतमधील मेरेडियन हॉटेलमध्ये असल्याची माहिती समोर आल्यानंतर आतापर्यंत शिवसेनेचे तब्बल २५ ते ३० आमदार नॉटरिचेबल असल्याची माहिती समोर आली आहे. त्यामुळे शिवसेना पक्षात उभी फूट निर्माण झाली आहे. आता उद्धव ठाकरे पक्षाला कसं सांभाळणार याकडे सर्वांचं लक्ष लागून राहिलं आहे. तसंच एकनाथ शिंदे आज पत्रकार परिषद घेऊन आपली भूमिका स्पष्ट करणार असल्याचीही माहिती समोर आली आहे. ते नेमके कोणती भूमिका मांडतात यातूनच सर्व चित्र स्पष्ट होईल.