पाचोऱ्यातील भडगाव रोड लगतच्या शक्तीधाम परिसरात एक दुर्दैवी घटना घडली आहे. १० वर्षीय चिमुकला शाळेतून आल्यावर सायकलचालवत खेळण्यात गेला आणि त्याचा ट्रॅक्टरखाली आल्याने त्याचा मृत्यू झाला असून परिसरात हळहळ व्यक्त होत आहे.
पाचोरा शहरातील शिंदे माध्यमिक विद्यालयात इयत्ता तिसरीत शिकत असलेला १० वर्षीय चिमुकला रुद्र हा पाचोरा शहरातील भडगाव रोडवरील राजीव गांधी कॉलनीत आपल्या आई वडिलांसोबत राहणारा रुद्र जितेंद्र गोसावी आज शाळेतून आल्यावर सायकल चालवत शक्तीधाम परिसरात खेळण्यासाठी गेला असता भरधाव येणाऱ्या ट्रॅक्टरखाली आल्याने होत्याचे नव्हतं झाले! चिमुकला रुद्राचा दुर्दैवी मृत्यू झाला असून परिसरात हळहळ व्यक्त होत आहे.
या दुर्दैवी घटनेची माहिती मिळताच रुद्रचे पालक घटनास्थळी दाखल झाले असता त्यांनी हंबरडा फोडला. घटनास्थळाहून रुद्रचा मृतदेह मुकेश पाटील (पुनगाव) यांनी रुग्णवाहिकेतून पाचोरा ग्रामीण रुग्णालयात दाखल केला. भडगाव रोडवरील राजीव गांधी कॉलनी परिसरासह शहरात शोककळा पसरली आहे. सदर संशयित ट्रॅक्टरचालक विरोधात गुन्हा दाखल झाला असून पाचोरा पोलीस तपास करत आहेत.
