धुळ्याच्या जवानाचं टोकाचं पाऊल, कुटुंबीयांना वेगळाच संशय..

धुळे येथील सीआरपीएफमध्ये कार्यरत असलेल्या धुळे शहरातील एका जवानानं कर्तव्यावर असताना टोकाचं पाऊल उचलल्यांची घटना समोर आली आहे. शहरातील देवपूर भागातील आनंद नगर, भोई सोसायटीत राहणारे सीआरपीएफचे जवान योगेश बिरहाडे यांनी जम्मू कश्मीर मधील पुलवामा येथे ऑन ड्युटी असताना स्वतःगोळी झाडून आत्महत्या केली. या घटनेमुळे एकच खळबळ उडाली असून अधिकार्‍यांच्या त्रासामुळेच त्यांनी हे टोकाचे पाऊल उचलल्याचा संशय कुटूंबीयांनी व्यक्त केला आहे. काही दिवसांपूर्वी सुट्टी संपवून सेवेत पुन्हा रुजू झाले होते.

योगेश बिरहाडे नुकतेच रजेवर धुळे येथे आलेले होते. रजा संपल्यानंतर ४ मे रोजी ड्युटीवर हजर होण्यासाठी निघाले होते. मात्र, जाताना त्यांची गाडी हुकली. त्यामुळे त्यांना जायला उशीर झाला. या कारणावरून त्यांना अधिकाऱ्यांनी टॉर्चर केले असावे, असा संशय कुटुंबीयांनी व्यक्त केला आहे. Xड्युटी जॉईन केल्यानंतर काल सकाळी साडेअकरा वाजता योगेश बिरहाडे यांनी घरी व्हिडीओ कॉल केला होता. तेव्हा ते पत्नी रामेश्वरी यांच्यासह मुलगा व एक वर्षाच्या मुलीसोबत बोलत असताना ते तणावात असल्याचे दिसून आले. त्यानंतर दुपारी एक वाजता जवाना योगेश बिरहाडे यांनी ऑन ड्युटी स्वतः गोळी झाडून आत्महत्या केली. ही बाब समजताच कुटुंबीयांनी एकच आक्रोश केला. त्यानंतर त्याच्या घरी नातेवाईकांना मित्र परिवाराने मोठी गर्दी केली. या घटनेमुळं बिरहाडे कुटुंबीयांना मोठा धक्का बसला आहे.

योगेश बिरहाडे यांचे सीआरपीएफमध्ये अवघी तीन ते चार वर्षांची सेवा शिल्लक राहिली होती, अशी माहिती नातेवाईकांनी दिली आहे.

जवान योगेश बिरहाडे यांच्या पश्चात आई-वडील, पत्नी, पाच वर्षाचा मुलगा, एक वर्षाची मुलगी भाऊ असा परिवार आहे. दरम्यान, त्यांच्या आत्महत्येचे नेमके कारण अद्याप समजले नसून, याप्रकरणाची सखोल चौकशी करून त्यांच्या आत्महत्येस जबाबदार व्यक्तीवर कारवाई करावी, अशी नातेवाईकांची मागणी आहे. योगेश बिरहाडे यांच्या आत्महत्येमुळं सुरक्षा दलातील जवानांच्या मानसिक स्वास्थाच्या मुद्दा पुन्हा समोर आला आहे.