झूम मराठी वृत्तसेवा
पाचोरा(झूम मराठी) तालुक्यातील शिंदाड येथील वाल्मीक अहिरे यांचे मित्र हाजी युनूस शाह पिंपळगाव बसवंत (नाशिक) यांनी त्यांच्या कन्येचे कन्यादान केले.अहिरे यांची कन्या प्रियंका हिचा विवाह आंबे वडगाव (ता. पाचोरा) येथील भास्कर शिंदे यांचे पुत्र विशाल यांच्याबरोबर आंबेवडगांव येथे झाला.
विवाह निश्चितीपासून ते विवाह पार पडेपर्यंत वाल्मीक अहिरे यांचे मित्र हाजी युनूस शाह खांद्याला खांदा लावून त्यांच्यासमवेत सर्व ठिकाणी उपस्थित राहिले. यावेळी अनोख्या मैत्रीचे दर्शन घडले.
- हिंदू धर्मानुसार केले कन्यादान
विवाहप्रसंगी पिंपळगाव बसवंत येथून म्हणजे सुमारे दोनशे किलोमीटरवरून पत्नी परवीन व शालकासह त्यांनी उपस्थिती दिली. विवाह सोहळा पार पडल्यानंतर हाजी युनूस शाह पत्नीसह प्रियंकाच्या कन्यादान विधीसाठी बसले व त्यांनी पुरोहितांच्या मंत्रोच्चारात हिंदू धर्मानुसार कन्यादानाचे सर्व विधी पूर्ण केले. पवित्र रमजानचा महिना सुरू असल्याने शाह दांपत्याने या वेळी अल्लाहला देखील प्रियंकाच्या सुखी संसारासाठी विनवणी करत साकडे घातले.
